ألبوم ريهانا الجديد جاهز

زي ما سمعت على كذا موقع هنا وهناك، ريهانا خلاص خلصت الألبوم الجديد بتاعها، واسمه Rated R زي الأفلام كده، الأفلام اللي فيها عنف كتير أو رعب أو مناظر بيدوها علامة حرف الآر علشان تكون Restrested يعني ممنوعة لمن تحت الـ 17، وكمان ممكن يكون اسم الألبوم جاي من فكرة أن أول حرف من اسم ريهانا هو آر كمان ..
اسم لطيف بالفعل .. مين الرايق اللي اختار الاسم ده ؟
فكرة إنك تيجي وتضيف شوية من الجنس والإثارة على أسماء ألبومات البنات بيعمل شغل جامد، لاحظ مثلاً إن ألبوم ريهانا اللي فات كان اسمه Good Girl Gone Bad يعني بنت كويسة بس بقت وحشة .. برضه مدية شغل ..
الألبوم صدر منه الأول أغنية جديدة واحدة هي Russian Roulette
أو لعبة المسدس الروسي، لما اتنين يحطوا طلقة واحدة بمسدس دوار كده ويلعبوا مين ممكن يجيب آخر التاني ..
وصورة الدعاية للألبوم .. احم .. ملفتة اوي زي ما أنتو شايفين كده ..
اسمع الأغنية كده وقل لي رأيك، أنا شخصيًا مش عاجباني أوي، أنا بحب ريهانا لما تكون في مزيكا عالية ورقص..