مسلسل عن حياة الصبوحة

فكرة إن حد يعمل مسلسل عن الصبوحة دي كانت فكرة عبقرية بجد محتاج اللي فكر فيها يأخدله يجي مليون جنيه ..
الست عايشة حياتها بالطول والعرض، ولو المسلسل كان بالفعل دقيق ومفهوش نصب ونقل الواقع على حقيقته أعتقد بجد إني هقعد واتفرج ..

الصبوحة .. شحرورة لبنان الشقراء صباح وافقت يتعمل مسلسل كامل عنها يتعرض في رمضان الجاي، ووقعت على العقد بالفعل ودلوقتي بيدوروا على حد يقوم بدورها بالمسلسل.

ووافقت المسلسل يتكلم عن جوازاتها التسعة اللي فاتت، وأهمهم جوازها من رشدي أباظة وجوازها من فادي لبنان ..

أعتقد بجد إن المسلسل ده هيعمل شكل جامد لو اتعمل كويس ..

بصراحة علشان هيكون عندي حاجات كتير ممكن اكتب عنها من ورا المسلسل ده، أصل الفضايح بحياة الصبوحة مبتخلصش ..

برأيكم .. هتطلع الصبوحة تعمل دور نفسها بالوقت الحالي على آخر حلقتين من المسلسل ؟؟

ويل سميث يرجع للنظارة السودا

مش فيلم السبعينات المصري طبعًا، قصدي فيلم "Men In Black" ..

النجم الأمريكي الأسمر هيعمل جزء ثالث من سلسلة الخيال العلمي والأكشن والكوميديا المعروفة، وهيرجع يتعامل مع تومي لي جونز برضه في الفيلم ..

هو بصراحة الفيلم يستاهل، الجزئين الأول والثاني جمعوا مع بعض أرباح وصلت لملياااااار دولار أمريكي ..

ما تدوني واحد بالمية من المليار ده .. مش عاوز أكتر من واحد بالمية ..

هو الموضوع لسه إشاعات بالنسبة للممثلين، بس خلاص استديو الإنتاج اتفق مع مخرج وكاتب علشان يعملوا الفيلم، وشكل الممثلين أكيد هيشاركوا كمان ..

قصدي يعني تومي لي جونز بيعمل فيلم ناجح مرة كل ثلات سنين، وأكيد ويل سميث هيشارك بالفيلم ..

تامر حسني مش هيعمل مسلسل

 

كل الأنسات اللي تحت العشرين واللي بيموتوا بتامر حسني ممكن دلوقتي يروحوا يعيطوا لأنه مش هيعمل مسلسل، وكل الرجالة اللي فوق العشرين واللي مش بيحبوا تامر حسني ممكن يرتاحوا ويتأكدوا من أن تمورة مش هيطلعلهم بالتلفزيون كمان برمضان الجاي.

تامر حسني، وبعد ما انتشرت أخبار إنه هيعمل مسلسل تلفزيوني لرمضان الجاي وإنه عايز ياخد 15 مليون جنيه مقابل دوره بالمسلسل (يا ترى مين اللي طلع الخبر ده ؟ أنا بقول تامر نفسه هو اللي طلعه بعد ما سمع عن موضوع مسلسل عمرو دياب)، المهم إن تامر أكده إنه مش فاضي (يا حرام) وبيجهز لفيلمه الجديد اللي هيفلقـ .. قصدي هيتحفنا بيه الصيف الجاي...

الحمد لله يا رب .. مفيش تامر بالتلفزيون المصري، مش ناقص أصله التلفزيون مع مسلسل يسرا ونور الشريف ويحيى الفخراني ..

 على فكرة يا تمورة .. اللي عاملك تنضيف بشرة بالصورة دي كاسفك خالص ..

شيخ الأزهر عايز يجيب آخرة إيناس الدغيدي

واحد من مشايخة الأزهر (ربنا يكبر من عمامتهم يا رب) قرر إنه يشارك جريدة وشوشة (جريدة صفرا كده محدش بيشتريها) رأيه الشخصية بالمخرجة المعروفة إيناس الدغيدي ..

الراجل مش عاوز كتير، عاوز بس إنهم يصلبوا إيناس الدغيدي ويقطعوا رجليها وإيديها .. عادي يعني أصله لسه شايف فيلم "محرر العبيد" وقرر إنه يستقي شوية أفكار منه ..

الراجل مخنوق كده لأن إيناس قالت الصيف اللي فات إن الحجاب زي المايوه كده .. موضة يعني ..

هو حد سمع إيناس بتقول الكلام ده ؟! ولولا الشيخ العلامة ده ذكر الكلام بجريدة، برأيك حد كان هيعرف إن إيناس قالت الكلام ده ؟

الشيخ بيختم كلامه قائلاً إن الست دي من أعوان الشيطان وإحدى خادماته، وإنها بتحارب رسول الله ودين الله .. ولازم تتصلب وتتعذب وكده يعني ..

يا راجل! أعوان الشيطان حتة واحدة ؟! سبحان الله ..

الشيخ، وأنا مش هذكر اسمه علشان مش عاوز نبيه الوحش يرفع عليّ قضية إتجار بالدين ولا أي قضية ملفتة للنظر من قضاياه إياها، كان ثاني من يرد على إيناس، ونبيه الوحش (يا للصدفة العجيبة! على رأي جريندايزر) هو اللي رفع القضية الأولانية، بيطالب بفصل إيناس الدغيدي عن جوزها، علشان كلامها ده بيخليها غير معتنقة للدين الإسلامي، يبقى كده لازم يبعدها عن جوزها المسلم ..

يا سلام! وإنته الآخر إيه عرفك جوزها مسلم ؟! مش ممكن عربيد صعلوك بيحب يشرب خمرة بالليل برضه ؟!

يا سيدي .. المهم بالموضوع بشكل عام حاجة واحدة بس ..

هو إيناس الدغيدي بتعرف تخرج أفلام أصلاً ؟ حد شافلها فيلم عدل بالسنين اللي فاتت ؟!

علا غانم ومسلسل الندم

لأ مش قصدي مسلسل اسمه (الندم) .. قصدي إنها مستمرة في الندم يعني ..

علا غانم أكدت لمجلة (لها) إنها نادمة على إنها شاركت في فيلم "الأكاديمية" اللي بيتعرض دلوقتي في شاشات السينما (ومحدش بيدخله إلا اللي ضغطه منخفض وعاوز يتعالج) ..

وعلا أكدت إنها مش ندمانة على الفيلم علشان إحساسها بنفسها وصورتها اللي (مش ولابد) على الأفيش .. لأ .. هيي ندمانة على القيمة الفنية بتاعة الفيلم، وهيي حاولت تقول للمخرج كذا مرة إن الفيلم ناقصة حاجة (دينا الرقاصة مثلاً ؟؟) بس المخرج مسمعش كلامها ..

شايفين يا جماعة ؟ دي مش غلطة علا .. دي غلطة المخرج ..

وده يعتبر ثالث فيلم للممثلة المخضرمة علا غانم بتعبر فيه عن ندمها في اختياره، كأن في حد جيه وحط مدفعية بوشها وقالها تمثل غصب عنها، فهيي ندمت على فيلم "لحظات أنوثة"، وكمان ندمت على فيلم "بدون رقابة".

معلش يا علا! هو آخر فيلم إنتي مثلتي فيه ومندمتيش عليه كان إيمتى ؟!!!

بصي يا علا هيي حاجة من اتنين : يا إما إنتي مبتعرفيش تختاري أفلامك صح!! يا أما المخرجين والمنتجين حاطين عنك صورة معينة بأذهانهم ومش هيدوكي إلا الأدوار اللي زي دي .. واللي بتندمي عليها برضه ..

علا دلوقتي بتمثل دورها في فيلم "أحاسيس" .. يا ترى هتطلع على أي مجلة بعد الفيلم علشان "تكشف عن ندمها" عن الفيلم برضك؟

فيلم جيمس كاميرون مسروق ؟

دلوقتي كلنا عارفين إن جيمس كاميرون (المخرج العبقري اللي عمل التايتانيك وطلع أول جزئين من سلسلة Terminator) بيجهز لفيلمه الجديد AVATAR، وهو فيلم خيال علمي بتدور أحداثه على كوكب تاني وكلام كبير من النوع ده ..

الفيلم هيكون ثلاثي الأبعاد (طبعًا ده حلم بعيد بالسينمات المصرية بس نعمل إيه؟!) وزي كل أفلام كاميرون هيكون تحفة فنية رائعة ..

المشكلة إن في حد بيتهم كاميرون دلوقتي إنه سرق فكرة الفيلم وقصته من رواية صدرت في الخمسينات اسمها Call Me Joe.

الفيلم بيتكلم عن واحد من المارينز المستقبليين أخد إصابة في معركة واتشل، فوافق إن الإدارة تبعته يحتل كوكب تاني مع مجموعة من صحابه عن طريق التحكم عقليًا بأجهزة آلية .. فبيحس إنه بيمشي من جديد ..

المشكلة إنه يمكن يضطر يتخلى عن ده علشان هو ضد إنهم يحتلوا كوكب جديد ويقضوا على الناس اللي عايشين عليه.

والكتاب بيتكلم عن واحد مخلوق فضائي عايش في بيئة معادية أوي بيحس بالسعادة لما يتحكم ـ برضك ـ بأجهزة آلية بتخليي يعيش على كوكب تاني، ويقاتل من أجل السلام على الكوكب التاني ..

يعني في فكرة واحدة تقريبًا هي فكرة الأشخاص اللي بيتحكموا بأجهزة آلية تخليهم يعيشوا حياة تانية وبيقاتلوا من أجل السلام ..

أنا مش حاسس أوي يعني إن الموضوع مسروق، ممكن يكون توارد خواطر، بس مش مشكلة أوي مع كاميرون، هيروح للورثة بتاع الكتاب يديهم خمسة ستة مليون دولار يسقطوا الدعوة ويخلص الموضوع على كده ..

شوف تريللر الفيلم فوق وقل لي رأيك يا باشا ...

هيدي كرم : جوزي بيغار علّي

لأ بجد يا حبيبتي ؟!

معلش يا أختشي معلش ..

الممثلة هيدي كرم قررت ترفع دعوة خلع ضد جوزها (واللي الخبر متعبش نفسه وذكر اسمه من الأساس) علشان بيغار عليها جدًا ومش سامحلها تعيش حياتها وتمارس شغلها زي ما هيي عاوزة ..

هي بتقول إنها حاولت تشرحله وجهة نظرها بطبيعة الحال (يا عين طانط عنيات)  وقالتله إن ده شغلها، وإن طبيعة عملها إنها تحتك بالمعجبين والفنانين وكده، بس هو بيغار عليها اوي خالص خالص .. فوجدت نفسها أمام خيارين إما الزواج أو العمل ..

طبعًا البنت الذكية تعرف مستقبلها فين، فراحت وقررت إنها تخلع جوزها وتتجوز شغلها ..

مبروك الخلع يا هيدي هانم، وشكرًا على دورك المميز في فيلم "حفل زفاف" اللي أنا مش فاكره أصلاً (وكمان مش عاوز افتكره) ..

النجوم وعرض فيلم جاكسون الأخير

مجموعة كبيرة من نجوم الفن والسينما قرروا يحضروا حفل إفتتاح فيلم "This Is It" في مدينة لوس أنجلوس مبارح التلات، طبعًا أنا رحت وسرقتلكم الصور من موقع بيريز هيلتون دوت كوم علشان تعرفوا تتفرجوا براحتكم عليها.

من بين الناس اللي حضرت كان ويل سميث وأدم لامبريت (مغني برنامج أميركين أيدول الناجح) وكيتي بيري وبولا عبدول وجنيفر لاف هيويت وغيرهم كتير ..

الناس راحت تتفرج على الفيلم وبعضهم طالعين عايشين الدور خالص يعني، بولا عبدول كتبت على التويتر بتعها إنها (مليانة مشاعر ومش عارفة تعبر عن نفسها وهيي بتتفرج على الفيلم).

أنا لسه مشفتش الفيلم وهشوفه يوم السبت مع صحابي، ربنا يسهل وألاقي تذاكر، شوية ناس طالعة بتقول الفيلم دموع وبكا وعياط وهتطلع مش طايق نفسك وناس طالعة بتقول إن الفيلم وحش وملوش لازمة ووجع دماغ ع الفاضي ..

يا سيدي .. هنتفرج ونشوف ..

هتروح تتفرج إنت على الفيلم ؟؟

يوسف معاطي في معاطي شو

الأسماء خلصت على فكرة ومعدش فيه إلا حاجة كلمة "شو" دي .. هالة شو .. بني أدم شو (بتاع أحمد أدم على قناة الحياة).. ودلوقتي "معاطي شو" سيادتك .. كله على أمل التمسح بفكرة أوبرا وينفري شو .. ربنا يخليكي لينا يا ماما أوبرا.

مين معاطي ده ؟؟

ده الكاتب الساخر طبعًا واللي وافق (لاحظ كلمة وافق دي كأنما كان في حد عبقري قاعد بقناة تلفزيونية ما وفكر فوجأة إنه يعمل الفكرة دي) إنه يعمل برنامج إذاعي وتلفزيوني (بالمرة .. ما هو كله كلام) يذاع على التلفزيون المصري وإذاعة الشرق الأوسط.

يوسف معاطي، واللي كتبنا مجموعة من أهم الأفلام السينمائية مؤخرًا، منها فيلم "بوبوس" طبعًا، هيطلع على التلفزيون لمدة ساعتين كل أسبوع، ويقدم البرنامج السياسي الساخر على غرار برامج ديفيد ليترمان شو وليت نايت شو اللي  بنشوفها على التلفزيون الأمريكي ...

معاطي هيقبض خمسين ألف جنيه على كل حلقة، وهيبدأ عرض البرنامج مع أول يناير الجاي ...

هتتفرج يا ترى ؟؟ أنا معتقدش إني أنا هتفرج ..

طفل كمال أجسام

في حاجات بتضايق بالدنيا دي، بس دي واحدة من أكتر الحاجات اللي بتدايق على الإطلاق ..

الطفل اللي إنتو شايفينه بالصورة بالفعل عامل كمال أجسام، ودي صورته وهو عمره 9 سنوات بس!!

الطفل ده، واسمه جويليانو سترو، وهو روماني، بدأ تدريبه على كمال الأجسام لما كان عمره سنتين!!

مفيش حاجة اسمها بدأ تدريبه لما يكون عمره سنتين، إحنا مش بنتكلم هنا عن أدهم صبري بصراحة، شكل كده باباه كان مجنون كمال أجسام ولا حاجة ..

الطفل ده دخل موسوعة جينيس للأرقام القياسية، مش علشان كمال الأجسام، لأ! علشان كان أسرع واحد مشي عشرة أمتار كاملة وفي كرة حديدة بين رجليه بدون ما توقع الكرة.

الفيديو اللي فوق الطفل فيه وهو بيتمرن ..
ممكن أتمرن كده أنا كمان ؟؟

زيلويجر وكوبر لسه بيحبوا بعض .. بلاش حسد منك له

من باب العلم بالشيء مش أكتر ..

عمنا برادلي كوبر وعمتنا رينيه زيلويجر مسابوش بعض يا رجاااالة ..

هما كانوا مع بعض أصلاً ؟

بتقول الإشاعات اللي انتشرت النهاردة الصبح إن الباشا الممثل (واللي بقى مشهور بعبط بعد فيلم The Hangover) ساب صاحبته الممثلة اللطيفة زيلويجر، واللي معملتش حاجة تفتح النفس من يجي خمس سنين.

الإشاعات دي (لا أساس لها من الصحة) زي ما بيقولوا كده بالمقالات المهمة، بالعكس الاتنين مبسوطين وفرحانيين وهيقضوا العطلة الجاية (مش عارف أي عطلة بصراحة، عندنا بالشغل مفيش عطل أساسًا فمش بتابع الرفاهيات دي) ببيت عيلة كوبر.

يعني زيلويجر رايحة تقابل بابا وماما علشان برادلي يحس بالسعادة ويفتخر أدام العيلة بقى وتشوفه بنت الجيران وكده ..

المهم يا سيدي .. اللي كان قلقان على مستقبل زيلويجر العاطفي ميقلقش .. البنت متضبطة على الآخر :)

قبول استقالة وزير النقل بعد حادث القطارين

هو أنا ماليش بالسياسة ولا بحب اكتب بيها، بس خبر زي ده لازم يتكتب ..
تمت الموافقة على طلب استقالة وزير النقل المصري المهندس محمد منصور وذلك بعد حادث القطارين الذي أودى بحياة مجموعة من المواطنين المتجهين إلى الصعيد، وخصوصًا بعد فشله في تطوير السكة الحديد وتجاهله لكل إحتياجاتها في الفترة الماضية.
بصراحة هي خطوة كويسة اوي إن يحصل حاجة بالأريحية دي وبالوضوح ده! الراجل مش عارف يعمل شغله وعمل مشكلة، يبقى يستقيل .. وطبعًا المناظر المأساوية اللي كلنا شفناها بحادثة القطار دي خلت موقف زي ده موقف كويس من الحكومة ..
إن شاء الله اللي يجي بعده هينضف السكة الحديد ويعمل منها مشروع قومي ولا حاجة لأن بجد السكة الحديد دي حاجة ممتازة للسفر والتنقل بكل الأشكال وبجد مفيش أحلى من القطارات للتنقل لما تكون أمنة وسالمة وكويسة ومش ثلاجة ولا هولوكوست ..

عقدة الخواجة ؟؟ منى وحلمي بيتعلموا تمثيل على إيد الأمريكان

حسب كلام موقع في الفن (واللي بحب اسرق منه أخبار طول الوقت) أحمد حلمي ومنى زكي وغيرهم يخضعون حاليًا لجلسات تدريبية على التمثيل على إيد خبراء أمريكيين من (أكاديمية هوليوود) ..

الخبر (واللي واخده في الفن من موقع المصري اليوم، يعني مش أنا الحرامي الوحيد) بيقول إن في 15 ممثل تانيين بيتعلموا على إيد الخبراء لمدة ثلاث أسابيع منهم أحمد عز وفتحي عبد الوهاب وخالد الصاوي ودينا وسوسن بدر وأنوشكا وكارولين خليل.

طيب يا سيدي .. حلو اوي إحساس الدراسة ده .. فاتحين الكراسات وقاعدين بتغششوا من بعض ؟؟

يا عز بطل تبص بورقة الصاوي .. عارف طبعًا إنك أمور وده اللي مخلي الناس تشغلك بس حاول .. بليز يعني حاول تمثل لمرة ..

ضحية الإعتداء مش عايزة ترفع قضية على بولانسكي

أنا بصراحة مش فاهم إيه موضوع بولانسكي ده .. في حاجة غريبة بتحصل فيه وأنا مش قادر أفهمها بصراحة ..

الراجل من حوالي الثلاثين سنة شرب بنت عمرها 13 سنة (حاجة أصفرة) واعتدى عليها، واترفعت عليه دعوة وهرب من الولايات المتحدة على فرنسا وعاش هناك السنين اللي فاتت دي كلها ..

ودلوقتي هو مقبوض عليه باسم الدعوة دي مرة تانية ..المشكلة بقى إن صاحبة الدعوى الأساسية، البنت اللي كان عمرها 13 سنة ودلوقتي عمرها فوق الأربعين بتقول إنها مش عاوزة الدعوة خلاص .. بتقول إن كل الإعلام اللي حاصل حوليها والصحافة وكل الكلام ده مخليها مش عاوز ترفع الدعوة أساسًا ..

بتقول إنها بيجيها 500 تلفون باليوم من الصحافة والإعلام علشان يسمعوا تعليقها على كل حاجة بتحصل بالقضية، بتقول إن ناس كتيرة طلبت منها مقابلات زي أوبرا وينفري مثلاً بس هيي رفضت ..

بتقول إنها مش عارفة تشتغل ومش عارفة تعمل إيه حاجة ..
دلوقتي إنت رأيك إيه ؟؟ هل علشان الست دي تقدر ترتاح وتبطل وجع الدماغ اللي من حوليها ده وكل المشاكل اللي بتؤدي إليها نقفل الدعوة على كده ولا نعمل إيه مع بولانسكي ؟؟

في ناس كتير بالمجتمع الأمريكي متعاطفين مع المخرج، وفي ناس عايزين يجيبوا أخره .. إنته إيه رأيك ؟

مايلي سايرس ؟! ممكن تلمي أختك لو سمحتي

البنوتة الأمورة اللي عمرها عشر سنين دي .. هي أخت مايلي سايرس .. مغنية المراهقات المعروفة واللي عاملة جو ابن ستة بسبعة بقالها سنتين ..

البنوتة دي، واسمها نوها سايرس، عمرها تسع سنين، وزي ما أنتو شايفين لابسة هدوم مش مناسبة خالص للي عمرهم تسع سنين ..

المشكلة مش هنا، المشكلة إن ده التنكر بتاع الهاللوين .. يعني بابا وماما اشتروها الحاجات دي علشان تروح "تعيّد" بيهم ..

ماشي يا سيدي .. الحمد لله إن العيلة منفتحة ..

الصورة ـ على فكرة ـ مسروقة مع موقع بيريز هيلتون .. :)

البقاء لله يا يارا!

توفى والد المغنية يارا في لبنان يوم الأربعاء 21 أكتوبر، وقررت يارا ترجع من قطر علشان تكون مع عيلتها بالموقف الصعب ده ..
معلش يا يارا، البقاء لله ..
يارا اضطرت تقطع زيارتها لقطر واللي كانت هتعمل فيها حفلة هناك علشان ترجع للبنان بعد أخبار الذبحة الصدرية اللي خدت منها والدها من أقل من أسبوع، وهيي دلوقتي بلبنان مع العيلة ..
يارا كانت متفقة مع وائل كفوري إنهم يعملوا مع بعض أغنية جديدة مشتركة، بس المشروع دلوقتي وقف لحد ما تقدر يارا ترجع لشغلها بعد ما تخلص فترة الحداد ..

راندا البحيري ونجاح "ليالي الحب"

إنته سمعت عن مسلسل "ليالي الحب" ده ؟ أنا مسمعتش عنه أصلاً بصراحة ..

بس بالآخر يمكن ده يكون تقصير مني مش أكتر ..

المهم يا باشا إن المتحدثة الرسمية باسم الممثلة المزة راندا البحيري بتقول إن نادي بتعيش حالة من النشاط الفني وبتصوير كمية أعمال ممتازة بعد نجاح "ليالي الحب".

معلش هو المسلسل ده اتعرض فين بالضبط؟! ولا فاكر حتى إي حاجة عنه ..

المهم يا باشا إن راندا رجعت تصور مجموعة من حلقات الجزء الثاني من مسلسل "لحظات حرجة" مع يسرا وأمير كرارة وراندا البحيري (أيوه مع راندا البحيري لأن راندا البحيري بتحب تصور مع راندا البحيري .. الخبر مكتوب كده في موقع "في الفن").

المسلسل ده هو المقتبس عن مسلسل "ER" الأمريكي المعروف، أنا شفت منه حلقة واحدة بس (الحلقة بتاعة لطيفة التونسية) وحسيته متصنع أوي، بس ده مش حوارنا خالص.

ثلاثين مليون يا عادل إمام ؟!

ووثيقة تأمين على الحياة كمان سيادتك ..

عادل إمام، وعلشان يرجع للشاشة الصغيرة بمسلسل رمضان اللي بعد الجاي، حصل على ثلاثين مليون جنيه مصري إلى جانب وثيقة تأمين على حياته يدفعها المنتج صفوت غطاس ..

يا سلام! كل ده علشان مسلسل !! ده ميزانية المسلسل كام بقى على كده ؟

الإجابة سهلة وواضحة : ستين مليون جنيه مصري علشان يتعمل مسلسل العرّاب..

هما هيجيبوا الفلوس دي ويربحوا كمان منين ؟!

المسلسل، ودي المرة الأولى لعادل إمام على التلفزيون من 1982 ومسلسل "دموع في عيون وقحة"، كتبه يوسف معاطي، وهو الكاتب المفضل لعادل إمام اليومين دول، واللي كتبه أفلامه حسن ومرقص وبوبوس وغيرهم ..

براد بيت في حادث فيزبا

مش فيزبا أوي يعني ... حاجة كده أحلى بشويتين ..

المهم يا سيدي المواقع العربية كلها عاملة من الحبة قبة وبتقول إن الحادث كان بسبب مصور باباراتزي وإن براد بيت عمل حادث وإنه كان هيموت ونجى من الموت بأعجوبة والكلام تبع الجرايد ده اللي بيجيبلي وجع بطن وإسهال ..
بس بصوا الموضوع بسيط، الراجل كان عاوز يعدي بالموتوسيكل بتاعه بين عربيتين، واحدة واقفة والتانية بتمشي، فالعربية التانية خبطت الفيزبا بتاعه، وكسرت جنبها شوية ..
الراجل كويس ومحصلوش حاجة .. ولما راح على العمارة اللي حصل الحادث جنبها مكنش بيحاول يستخبى من حد كان عاوز يعمل تلفون علشان ماما أنجلينا تيجي تنقذه من الورطة اللي هوه فيها ..
فالموضوع بسيط ومش محتاج وجع دماغ يا شباب ..
سلامتك براد باشا! ابقى خلي بالك وإنت بتسوق الفيزبا شوية .. ثم بصراحة كده احلق الدقن دي حرام عليك منظرك مش ولابد خالص يا مان!

Top Spot: Paranormal Activity

فاز فيلم "Paranormal Activity" بصدارة شباك التذاكر الأمريكي للأسبوع ده، وقدر يتجاوز مبيعات فيلم SAW VI نفسه، رغم إن السلسلة قدرت توصل للمركز الأول أربع مرات من أصل الست مرات اللي نزل فيها فيلم للسلسلة.

السنة اللي فاتت فيلم "High School Musical" الجزء الثالث هو اللي ابعد فيلم Saw V من الوصول للقمة، وخلى منظر السلسلة زي الزفت، بس على الأقل جمعوا فلوس أكثر من 20 مليون دولار بأول أسبوع بالسنة اللي فاتت، السلسلة السنادي مجمتعش أكتر من 15 مليون دولار بس .. وده تقريبًا أقل رقم وصلته السلسلة ..

أما فيلم القمة، فالفيلم أصلاً كان بالمركز الثالث الأسبوع اللي فات، واللي قبله كان بالسابع تقريبًا، لأنه واحد من الأفلام دي اللي عاملينها كأنها فيلم وثائقي وهيي فيلم رعب، زي فيلم The Blair Witch Project اللي شفناه من يجي عشر سنين ..

فهارد لك لفيلم SAW وبرافو فيلم Paranormal Activity واتفرج معنا على التريلر بتاع الفيلم وابقى قلي رأيك ...

بنت المغنية شير بقت .. ابن المغنية شير

الأنسة شاستيتي بونو .. بنت المغنية الأمريكية المعروفة شير .. قررت بيوليو اللي فات إنها مش عاجبها الجو .. وقررت تبقى راجل ..

والموضوع كان مقبول اوي من مامتها المغنية المشهورة، وخدت الفكرة بشكل فريش خالص وبتفتح عقلي واضح ..

هتلاقي هنا آخر صورة للأخ/الأخت شاستيتي .. واللي بقى اسمها تشاز بونو دلوقتي ..

العملية تمت بيوليو اللي فات بس لحد دلوقتي لظهر تشاز للمرة الأولى آدام الناس بـ .. احم .. شكله الجديد ..

سلامتك يا جومانا

جومانا مراد وقعت عن خشبة مسرح في العاصمة الأردنية عمان وانكسرت رجلها الشمال.
آي! سلامتك يا جومانا! ممكن امضي على الجبس أنا كمان ؟!
بعد ما وقعت الوقعة دي، قررت جومانا ترجع سوريا، بلدها الأصلي، علشان تقضي فترة النقاهة، وهي ستستمر لثلاثة أسابيع كاملة لحد ما يفكوا الجبس عن رجلها.
الموقف حصل لما تم دعوت جومانا على خشبة مسرح مع مجموعة من النجوم العرب اللي دعموا مؤتمر الأطفال العرب العباقرة برعاية الأميرة عالية بنت الحسين، وهي نازلة على السلم علشان بعد ما استلمت جايزتها اختل توازنها ووقعت.
طبعًا المشكلة دي هتعطل تصوير مسلسلها السوري الجديد "رجال مطلوبون" للمخرج حاتم علي، اللي كان مستني ترجع من الأردن علشان يكمل شغل.
سلامتك مرة تانية يا جميل! تقومي بالسلامة وتكملي شغل قريب يا باشا!

مايكل جاكسون : القصص السرية

مش كل الناس مبسوطة بإن فيلم "This Is It" واللي هيصدر بالسينمات يوم الأربع الجاي هيحكي آخر لحظات حياة المغني الراحل مايكل جاكسون، بعض الناس حاسسين إن الموضوع في خدعة كبيرة ..
ناس كتير مقتنعة إن الفيلم هو محاولة تنظيف لضمير الناس اللي اجبروا مايكل جاكسون يتدرب على تجهيز جولة فنية لخمسين حفلة كاملة في لندن مع إنه كان موافق يعمل 10 بس! ومقتنعين اوي إن الناس اللي حول مايكل جاكسون اجبروه على كل حاجة، واجبروه ياخد ادوية بالليل والنهار علشان يقدر يعملها، وإن كل الضغط من طرفهم هو اللي جاب آخر المغني المعروف.
الإقتناع ده ادى إلى افتتاح موقع على الإنترنت اسمه This is NOT it لكل الناس اللي مش عاوزة تشوف الفيلم ومقتنعة إنه مجرد محاولة لجمع الفلوس من بعد وفاة مايكل جاكسون ..
الفيديو اللي فوق ده هو واحد من فيديوهات الحملة، وبيحكي تفاصيل مش مسموعة قبل كده عن الموضوع بأكمله .. شوفوه كده وقل لي رأيك ..
هل هتشوف فيلم مايكل جاكسون لما ينزل بالسينمات المصرية يوم الأربع ولا لأ ؟
الفيلم هيكون موجود يوم الأربعاء 28 اكتوبر بالسينمات لمدة أسبوعين بس، وهو هيكون بسينما جالكسي وسيتي ستارز بس ..
ابقى قول لي رأيك

لينزي لوهان طالعة من فيلم رعب

آخر صورة لقيناها للأخت لينزي لوهان، البنت دي كانت مزة زمان: دلوقتي بصراحة مش عاوز اشوفها حتى ولو بفيلم رعب ..
مش عايز أحلم بيها من الأساس .. بخاف والله حرام يعني ..
فاكرين أيام "Mean Girls" وقتها البنت دي كانت بجد من أجمل ممثلات هوليود وكنت فاكر إنها هتعمل بقى مستقبل وتبقى حاجة محصلتش ..
هي بصراحة حاجة محصلتش دلوقتي كمان :)

فيفتي سينت لقى حد يحبه يا رجاااالة

سعنا كده إن عمنا فيفتي سينت، أيوه الراجل بتاع زمان اللي كان يعرف يغني راب وبطل من شويتين كده، كان بيصور فيديو كليب لأغنية جديدة بتاعته، من ألبومه اللي بيتأجل كل أسبوعين ده Before I Self-Destract، قابل كيلي رولاند، وإن الاتنين كانوا .. همم .. بالموود يعني وأنهم ضبطوا وكده يعني ...
ولو إنك بتسأل مين كيلي رولاند، دي واحدة من البنات التلاتة اللي كانوا عاملين فريق داستني تشايلد، أيوه، اللي مش بيونسيه يعني واللي حياتها الفنية انتهت لما بيونسيه سابت الفريق ..

هو بصراحة الاتنين يليقوا على بعض، هما الاتنين ملهمش لازمة بعالم المزيكا بقالهم زماااااان ...
المهم يا باشا، إنت رأيك إيه ؟ هل لسه للاتنين دول أي أهمية بعالم المزيكا ؟! وهل هما الاتنين ليهم مستقبل مع بعض ؟؟

Inglourious Basterds

فيلم Inglourious Basterds دلوقتي بالسينمات المصرية، رحت اتفرجت عليه من حوالي الأسبوع وعجبني بصراحة، أنا بحب أفلام تارنتينو اوي وبصراحة الراجل عبقري بشكل غريب، وكمان براد بيت ضاف للفيلم أكيد، الفيلم دلوقتي بسينمات : رينسانس نايل سيتي، وجنينة، وسيتي سنتر ومترو ورينسانس ستة أكتوبر .. يعني بالسينمات اللي تابعة لشركة رينسانس ..

ألبوم شاكيرا هيوقع وقعة سوداااا

أنا بصراحة مش فاهم إيه اللي خلى شركة إنتاج شاكيرا تعمل حركة هبلة زي دي ..
ألبوم شاكيرا الجديد "She Wolf" تم إعلان ميعاد إطلاقه في السوق في أمريكا، وهو يوم 23 نوفمبر الجاي ..
المشكلة بقى بالموضوع مش هنا، المشكلة إن اليوم ده هو اللي هيصدر فيه ألبوم ليدي جاجا الجديد "The Monster Fame" وألبوم آدم لامبريت الجديد For Your Entertainment وكمان ألبوم ريهانا Rated R وألبوم بريتني سبيرز اللي لامم كل أغانيها القديمة الحلوة The Singles Collection.

مع كمية الألبومات المهمة دي، محدش هيشتري ألبوم شاكيرا إلا المعجبين اللي بيموت بيها، وهما عدد كبير بالفعل، بس مش بالدرجة الكافيه ..

عادة المغنيين والمغنييات بيدوروا ينزلوا بأمريكا بأسبوع مختلف عن بعضهم، بس فترة الكريسمس والأعياد هناك فترة مهمة وبتبدأ قبل الكريسمس نفسه بحوالي الشهر، علشان كده كل الناس بتنزل مع بعض ..
بس برضك، كان ممكن تستنى أسبوع، خصوصًا وأن مبيعات أغنيتها الجديدة She Wolf مكنتش بأحسن ما عليها يعني ..

بصراحة الأغنية حلوة (وإنته ممكن تشوفها على الفيديو بأول البوست) وكمان باين إن باقي أغاني الألبوم حلوة كمان، سمعت منه أغنية اسمها Gypsy ببرنامج الإكس فاكتور وكانت ممتازة بجد ..
بس برضه بجد، أدم لامبريت عمل ضجة كبيرة بالسنة اللي فاتت، وليدي جاجا بقت مادونا بتاعة الأيام دي، فالموضوع محسوم بشكل من الأشكال.

على أي حال، أكيد هنشوف مين اللي هيجيب النتيجة الحلوة ويطلع الأول ويبيع أكتر .. وكده ولا كده العرب مش مهتمين أوي بالموضوع ده لأنهم غالبًا بيحملوا الأغاني ببلاش على البير شير ..

اسمع أغنية "She Wolf" وقولنا رأيك، وطبعًا ده مش الفيديو الأصلي بتاع الأغنية، ده محتاج منك إنك تدخل على اليوتيوب وتدور بنفسك .. أنا مش هعملك كل الشغل هنا يا عم ..

ألبوم ريهانا الجديد جاهز

زي ما سمعت على كذا موقع هنا وهناك، ريهانا خلاص خلصت الألبوم الجديد بتاعها، واسمه Rated R زي الأفلام كده، الأفلام اللي فيها عنف كتير أو رعب أو مناظر بيدوها علامة حرف الآر علشان تكون Restrested يعني ممنوعة لمن تحت الـ 17، وكمان ممكن يكون اسم الألبوم جاي من فكرة أن أول حرف من اسم ريهانا هو آر كمان ..
اسم لطيف بالفعل .. مين الرايق اللي اختار الاسم ده ؟
فكرة إنك تيجي وتضيف شوية من الجنس والإثارة على أسماء ألبومات البنات بيعمل شغل جامد، لاحظ مثلاً إن ألبوم ريهانا اللي فات كان اسمه Good Girl Gone Bad يعني بنت كويسة بس بقت وحشة .. برضه مدية شغل ..
الألبوم صدر منه الأول أغنية جديدة واحدة هي Russian Roulette
أو لعبة المسدس الروسي، لما اتنين يحطوا طلقة واحدة بمسدس دوار كده ويلعبوا مين ممكن يجيب آخر التاني ..
وصورة الدعاية للألبوم .. احم .. ملفتة اوي زي ما أنتو شايفين كده ..
اسمع الأغنية كده وقل لي رأيك، أنا شخصيًا مش عاجباني أوي، أنا بحب ريهانا لما تكون في مزيكا عالية ورقص..