أحنا مش هنبطل بقى ؟؟ كده عيب

أحنا مش هنبطل نعمل أفلام مسروقة ومنسوخة من أفلام أجنبية ؟

مش هنبطل نعمل فيديوهات لأغنياتنا مسروقة بالمسطرة من الفيديوهات الأجنبية برضه ؟

بيقولك في أزمة ورق! وفي مليون رواية جديدة كل يوم تستاهل تتعمل وتبقى من أهم الأفلام ..

بيقولك أن مفيش كتّاب أو مؤلفين .. بس المؤلفين ماللين البلد .. وأصلاً بهوليود وبالبلاد المتقدمة ما بيكونش في كاتب واحد .. في شركة متخصصة إنها تجمع الكتاب وتخليهم يكتبوا مع بعض أفلام وبعدين تتباع السيناريوهات لمنتجي الأفلام ..

أحنا هنبطل سرقة إيمتى؟! دي جريمة ومش هنعرف نبطلها مش كده ؟!!

المحرر المسئول عن وش خشب كتب قبل كده مليون مقال بيوضح سرقات، مقالات عن فيديو كليب بتاع أغنية لنوال الزغبي مسروق زي ما هو بالديكور عن أغنية لفريق سبايز جيرلز .. بوستر ألبوم محمد فؤاد المسروق بالحرف وبالتصميم من بوستر ألبوم المغني البريطاني روبي ويليامز .. وغيرها كتير ..

وإليكم الجديد :

مثال رقم واحد : 

الفيديو الجديد لمغنية مسمعتش عنها قبل كده اسمها "سمية" لأغنية اسمها "مش سهلة" : المغنية سخيفة والأغنية أسخف والأغنية كانت هتعدي على خير (خصوصًا وأن الموزع الموسيقي حاطط رنة بالأغنية أقرب لرنة موبايل نوكيا القديم إياه ) بس هتلاحظ معايا إن الأغنية مش غريبة خالص .. بص على الفيديو كده وقل لي رأيك :

 الأغنية ـ زي ما هتكون لاحظت لو بتابع الأغنيات الأمريكية الناجحة ـ مسروقة من فيديو لأغنية كيتي بيري اللي اسمها "Hot and Cold" الأغنية جابت فلوس كتير لكيتي بيري وشهرتها اوي ففين المشكلة نسرق الفيديو بالحرف ؟؟

شوف فيديو كيتي بيري وقول لي رأيك :

إيه رأيك بقى ؟ الموضوع وصل لفستان الفرح، للعجلة اللي راكباها، للعب فوق العربية ... كل حاجة بالحرف ..
ده مش تشابه فيديوهات، دي نسخ ولص زي بالويندوز كده.
مثال رقم 2:

فيلم السخيف جدًا واللي الناس مش طايقاه ومتعرفش ليه أصلاً بيعمل أفلام الأخ رامز جلال .. فيلمه الجديد اسمه "حد سامع حاجة؟" وتعالى معايا كده بص على التريلر بتاعه :

الفيلم شكله بيض أصلاً ومش عايز أدخله، بس لو بصيت شويتين، وكنت زيي محرر وش خشب بتحب الأفلام الأجنبية وبتابعها، هتلاحظ إن فكرة الفيلم مسروقة جدًا من فيلم اسمه "Stranger Than Fiction" للممثل الكوميدي ويل فاريل، شوف معايا اعلان الفيلم الأجنبي وقل لي رأيك :

لاحظ طبعًا إن الفيلم الأجنبي تجاوز محاولة عمل "المفاجععععة" فيك بأن الموضوع كله عبارة عن مؤلف روائي وإن الشخصية اللي هي رامز جلال (أو ويل فاريل) هو الشخصية الرئيسية بأحداث الرواية اللي بدأت تسمع الرواية بتتقال.
الفيلم الأجنبي خد الموضوع  بجمال وبلطافة وفاكر إنه عجبني اوي .. بس أحنا مش هنبطل نعمل سرقات سخيفة، لازم نضيف بهارات، في مشهد مسروق بالحرف من فيلم The 40 Years Old Virgin لما الواد بيحاول يحسن من مظهره علشان حبيبته تحبه، فيشيل الشعر اللي على صدره ..
شوف المشهد معايا كده وقل لي رأيك :

فالسؤال بقى : أحنا مش هنبطل بقى بجد ؟؟ عيب كده اوي اوي اوي اوي اوي ..

وفاة الممثلة بريتني مورفي

الممثلة بريتني ميرفي لقتها مامتها بالحمام ميتة صباح مبارح الأحد ..

الممثلة، واللي لسه عمرها 32 سنة، محدش عارف إيه سبب وفاتها لسه، بس الإشاعات عن إدمانها للأدوية وللمخدرات طوال السنة اللي فاتت ممكن تدل بشكل من الأشكال على أسباب وفاتها ..

ميرفي معروفة بأدوارها لفتاة المراهقة والأدوار الكوميدية .. هيي عملت دور واحدة من بطلات فيلم Sin City وكمان عملت دور المتجوزة جديد من حبيبها لتكتشف إنهم مش نافعين مع بعض بفيلم Just Married ده إلى جانب إنها قدمت صوت جلويا بفيلم Happy Feet مع العبقري روبين ويليامز وغير كده كتير ..

الله يرحمها يا سيدي .. وش خشب زعلان عليها اوي اوي ومش طالبة معاه يدي حد الوش الخشب النهاردة :(

هيفاء وهبي تغني في العراق

واو ..

ده خبر جديد وأول من نوعه بالفعل

هيفاء وهبي .. محبوبة الملايين واللي رغم سنوات عمرها اللي تجاوزت الأربعين بمراحل لازالت "سيكس سامبل" و"مغرية الرجال" في الوطن العربي بعد سنوات من ظهورها .. قررت إنها تعمل حفل بالعراق هو تقريبًا الأول من نوعه من أيام حرب 2003 ..

فريق أمني متخصص هيقوم بتغطية الحفل ويظبطه ويتأكد إن مفيش مشاكل هتحصل .. ومن المتوقع تحديد ميعاد الحفل في يناير من عام 2010 .. حسب ما قالته جريدة الدستور ..

أنا مش بقتنع عادة بكلام جريدة الدستور وفي أحيان كتير بيطلع الكلام قلب وخلاص وأي حاجة تلفت النظر وتبيع .. بس يمكن يا سيدي الحفل ده يتعمل بجد ..

مين عارف ؟؟

ليه معندناش بوكس أوفيس ؟؟

مشكلة كبيرة بين الشركة العربية (اللي مطلعة فيلم "أمير البحار" بتاع هنيدي) والمجموعة الفنية المتحدة (اللي مطلعة فيلم "ولاد العم" بتاع منى زكي وشريف منير وكريم عبد العزيز) ..

المشكلة بقى يا باشا هو أن الشركة العربية بقالها من أول ما نزلت أمير البحار وهي بتقول إنه على قمة مبيعات شباك التذاكر المصري طول فترة العيد، وإنه جمع من أول العيد لحد دلوقتي يجي 13 مليون جنيه مصري وإن ده رقم خيالي مش معقول ..

ودلوقتي المجموعة المتحدة قررت تدلو بدلوها (حلوة تدلو بدلوها دي) وتقول إن فيلم ولاد العم ـ في الواقع ـ جايب 14 مليون جنيه مصري وقرروا يطلعوا لسانهم للشركة العربية ويقولولها إنها كداااابة ..

زي العيال يعني بالضبط ..

أه والله زي العيال .. أنا البسكوتة بتاعي أحلى .. لأ أنا البنوبناية بتاعتي اطعم ..

الفيلمين جابوا فلوس كتير بالفعل، وعملوا أرقام قياسية .. وش خشب تعتقد جدًا إن فيلم ولاد العم يستاهل إيرادات أكثر من فيلم أمير البحار بس ده مش مكان وش خشب علشان نتكلم .. ولا حتى مكان الشركتين ..

في شركة كبيرة بأمريكا شغلانتها إنها تتأكد من إيرادات كل الأفلام كل أسبوع وتطلع كل يوم أحد بالليل مقدار مبيعات كل فيلم وترتيب الأفلام بالمراكز العشرة .. علشان كده عندنا حاجة مضمونة وأكيدة الكل بيعرفها ومفيش داعي إننا نلعب شد الحبل بين الشركتين ..

ليه معندناش شباك تذاكر زي الشباك التذاكر الأمريكي ؟! كنت فاكر إن الموضوع بالأول كان لأننا مش عاوزين، دلوقتي حاسس إن الموضوع ببساطة علشان في ناس خايفة من الحسد .. وفي ناسة تانية عاوزة تلعب بالأرقام زي العيال ..

طيب يا سيدي ..

إنت قولي بقى ؟ إنت شفت أي من الفيلمين ؟؟

بيونسيه .. بشكل سنجابي خالص

ألفين والسناجب، فيلم صدر من شويتين مقتبس من أفلام كرتون معروفة ..

ودلوقتي بيطلع منه الجزء الثاني ..

الممتع بالموضوع إن الأفلام دي عارفة بجد إزاي تعلن عن نفسها وتظهر بقوة وتلفت الأنظار، يعني دلوقتي هما عاملين حاجة مضحكة وحاطينها ببلاش أونلاين وراكبين موجة الكل ركبها قبل كده ..

أغنية "Single Ladies" بتاعة بيونسيه .. بس بشكل سنجابي خالص ..

تعالوا نتفرج على الفيديو مع بعض :

زواج هاني البحيري ..

وش خشب بتحب تبارك للأستاذ المصمم العالمي العظيم الفزيع اوي اوي هاني البحيري على زواجه من الست الإيطالية المزززة أليسا ..

الباشا بعد زواجه حط حد لكل (((الإشاعات))) التي طلعت عليه ..

قصدي طبعًا إشاعات علاقته بكل نجمات السينما والتلفزيون طبعًا أكيد .. أعتقد كلامي كان واضح ..

مبروك تاني .. يا عم هاني ..

من أين لكِ هذا يا أنجلينا ؟

من عرق جبيني يا مولاي!

احم .. نرجع نتكلم عادي بقى ..

أنجلينا جولي احتلت المركز الأول بقائمة الممثلات اللي ربحوا فلوس لأنفسهم السنة دي بهوليود .. والأرقام تبشر بأنها كانت سنة خير لماما أنجلينا ..

أكيد العيال عايزين هدايا كريسماس محترمة دلوقتي ..

أنجلينا، وبعد ما طلعت فيلمين السنة دي هما Changeling و Wanted  حطت بجيبها حوالي تقريبًا يعني الأربعين مليون دولار أرباح بتاعتها هي شخصيًا، ده عدا عن أرباح الأستديو وغيره كتير ..

ومن المتوقع إن أنجلينا تجيب على الأقل عشرين مليون دولار تانيين السنة الجاية لما تطلع فيلمي The Tourist وSalt والأتنين شكلهم تحفة أصلاً ..

ما تيجي تتفرج معايا على التريلر بتاع فيلم Salt ده .. ده شكله هيكون فيلم من إياهم يا باشا :

ألانيس موريسيت .. والماريوانا

المغنية الكندية اللطيفة ألانيس موريسيت، واللي مش معروفة أوي بالعالم العربي بس واحدة من أهم المغنيات بأمريكا وأوروبا، قعدت مع مجلة لطيفة كده اسمها "High Times" للحديث عن آخر أعمالها الفنية ..

ولكن يبدو أن كلمة "High" باسم المجلة مش معناه عالي بالمعنى العادي .. لأ .. ده معناه دماغ عالية ..

المجلة دي متخصصة بالحديث عن آخر صيحات الحشيش والماريوانا وكل ما له علاقة بهذه المواد المخدرات التي لا يشجع موقع "وش خشب" أي من متابعيه استخدامها .. (وش خبيث شيطاني بيبص يمين وشمال وبيطلع حاجة من جيبه وبيولعها .. )

ألانيس قعدت مع المجلة قعدة حلوة كده وقعدوا اتكلموا عن الموضوع ده بالذات .. وألانيس قالت بالحرف :

ـ أنا بحاول دايمًا كون معتدلة باستخدام الماريوانا، كفنانة ومغنية دايمًا في بداية حلوة للشغل الفني بتساعد الماريوانا على إطلاقه فيّا.

عادة ما بكون عندي حاسة سادسة عالية طول حياتي، ودايمًا بحس إني قادرة استقبل رسايل من العالم الخارجي، وبصراحة أنا دايمًا بتجاهل الرسايل دي لما مش بتكون دماغي عالية.

ولكن لما دماغي تكون عالية، الرسايل بتوصل ومبيكونش في حاجز بيني وبينها، علشان كده لما بكون حاسة إني عاوزة استوضح رسالة ما أو عايزة اكتب أغنية جديدة ومش عارفة اكتبها، دايمًا في حل سريع للمشكلة دي ..

وبينتهي هنا الكووت من أختنا ألانيس ووش خشب سعيدة جدًا بالمشاركة اللي قدمتها ألانيس للعالم بتوصيل الرسايل دي لينا ..

دلوقتي بقى : عاوزة الـ G علشان تكبري الـ D يا ألانيس ؟؟!!!

محمد فؤاد يؤجل ألبومه ..

قال إيه .. علشان أحداث أم درمان بالسودان ..

يا عيني .. لأ أنا تعاطفت اوي اوي والله يا فؤش .. مش باين على وشي ؟؟

الآلبوم، واللي كان من المفترض ينزل بعيد الأضحى بس محدش لقاه في السوق، تم تأجيله حاليًا إلى نهاية العام ومع احتفالات رأس السنة ..

لأن ـ حسب كلام المتحدث الرسمي باسم فؤش (وفي أقوال أخرى الدب القطبي) ـ المغني بعد رجوعه من السودان حالته المزاجية كانت مش ولابد فقرر يأجل الألبوم ..

الكلام ده فكرني بالحفلات اللي اتأجلت بالعيد برضه للأسباب نفسها ..

أنا شخصيًا معنديش مشكلة يكون في تعاطف بين الفن واللي حصل بأم درمان، أنا بالعكس متعاطف جدًا مع اللي حصل بالسودان وشايف إن الجزائريين تعاملوا بشكل يثبت أصولهم البربرية .. بس برضه مينفعش من مغني إنه يعدل ميعاد إطلاق ألبومه حسب حالته العاطفية ..

بأوروبا والدول المتقدمة ـ يا باه ـ المغني أو المغنية بيعلنوا عن إصدار ألبوم قبلها بسنين وبيلتزموا بالميعاد ده .. ولما يتم التأجيل بيتم قبلها بشهور أو على الأقل بأسابيع مش بعد ميعاد الإصدار بالفعل وبعد ما الناس نزلت تدور على الألبوم ملقتوش ..

وبيكون التأجيل عادة لأسباب فنية بحتة .. زي إن في أغنية عاوز تضيفها، في أغنية عاوز تغير فيها .. إلخ .. مش علشان المغني مش طالبة معاه ..

ليه نخلي أحداث زي دي تأثر علينا سلبًا ؟! لأ نخليها تأثر علينا إيجابيًا ونطلع الألبومات والأفلام ونعمل حفلات ونوري الدنيه كلها إننا واقفين على رجلينا .. الموضوع مضايقنا وهنجيب حقنا .. بس بالوقت نفسه محدش يقدر يزعلنا بكلمة ..

يلا .. كل تأجيل وإنتم طيبين ..

ليدي جاجا والخوف من المسرح

هو صحيح هيي مش باين إنها بتخاف من أي حاجة (إلا من نفسها لما تبص على نفسها بالمراية طبعًا) بس الست دي كانت خايفة موت بأول يوم ليها بجولتها الفنية الجديدة ..

ليدي جاجا ـ وبيوم افتتاح جولتها الفنية The Monster Ball في مونتريال بكندا ـ واجهت موقف مش حلو .. وقعت على .. احم .. مؤخرتها ..

الفيديو ـ طبعًا ـ موجود وممكن تشوفوا اللي حصل بعد 20 ثانية تقريبًا من بدأ الأغنية ..

هو بصراحة باين على ليدي جاجا إنها كانت خايفة أو مش متعودة على المسرح، لأنها بالحفلة دي بالذات وقعت ثلاث مرات ..

إيه هي الكلمة الأكثر استخدامًا في العالم ؟

 بصراحة مش عارف إيه فايدة إننا نعرف حاجة زي كده .. بس أهو يا سيدي .. معلومة زيادة تعرفها النهاردة وتقولها لصحابك فيبصوا عليك بتعاطف وبعدين يتجاهلوك لساعة ولا ساعتين ..

المهم .. في شركة اسمها The Global Language Monitor أكدت إنه بعد حسابات دقيقة : اكتر كلمة تم استخدامها في العالم كانت كلمة Twitter وده ـ للي ميعرفش يعني ـ موقع تفاعلي زي الفيس بوك كده بس ستاتيسوس بس ..

المركز الثاني كان لاسم باراك أوباما (طبعًا) والثالث لكلمة H1N1.

زي ما إنته شايف، اهتمامات الناس مهمة وترتيبها جيد جدًا لدرجة أننا مهتمين نتعامل مع التويتر أكتر من السياسة والأمراض المعدية ..

ثم .. سؤال تاني يعني ؟ الشركة دي اللي عملت المعادلة العظيمة دي .. إيه اللي طلعلها بالآخر ؟ يعني بتدفع فلوس موظفيها منين ؟؟

لحظات "خاصة" مع جنيفر لوبيز

حبيب جنيفر لوبيز اللي سابته قبل ما تتجوز الهيكل العظمي المعروف بمارك أنتوني قرر إنه يعرف العالم كله على "حقيقة" جنيفر لوبيز ..

الأستاذ قرر أنه يبيع الفيديوهات والأفلام اللي صورها مع جنيفر بشكل "شخصي" لما كانوا مع بعض .. طبعًا جنيفر قالتله عند أمه يا أدهم ورفعت عليه قضية بعشرة ملايين دولار ..

الحلو بالموضوع طبعًا إنها ـ بطبيعة الحال ـ لما رفعت القضية منعت بيع الفيديو .. فالراجل اتقمص وقرر يعمل حركة لطيفة اوي..

قرر إنه يدي نسخ من الفيديو للمحكمة، على شباك المحكمة يسيب نسخ للفيديو .. ده بطبيعة الحال مش مخالف للقانون، بالعكس، ده القانون نفسه. المشكلة إنه قال للناس كلها، ودلوقتي المجلات مستنية على نار إنه ينزل الفيديو ببلاش للعاملين بالمحكمة، وهما يجيو وياخدوا منها نسخ ببلاش برضه ..

الراجل شكله دمه اتحرق من الموقف ككل .. فقرر يعمل فيها شمشون وخربها على نفسه وعلى كل الناس ..

يا سيدي .. المجلات والجرايد هي الفائزة رقم واحد .. وكلنا مستنيين يوم الاتنين بعد بكره علشان نشوف .. الحقيقة وراء جنيفر لوبيز ..

أفلام "ثقافية" .. أم الأجنبي ..

فيلم "القمر الجديد" بيلم فلوس كتيييير

فيلم "New Moon"، وهو الجزء الثاني من سلسلة أفلام "Twilight"، حقق بأول يوم من عرضه .. أول يوم بس يعني .. تقريبًا 72 مليون دولار أمريكي في الولايات المتحدة بس ..

يا سلام!

يعني الفيلم ـ اللي مكلف تقريبًا 30 مليون دولار علشان يتعمل ـ حقق تقريبًا 120 % أرباح بليلة واحدة بس..

الفيلم متوقع ليه إنه يحقق تقريبًا 125 مليون دولار النهاردة بالليل، علشان يبقى رابع أكتر فيلم بيحقق فلوس بتاريخ السينما الأمريكية على الإطلاق ..

الفيلم، واللي بيتكلم عن مصاص دماء والبنت البشرية اللي بيحبها، وكلام رومانسي كتير بيخلي الرجالة عايزة ترجع، هعمل شغل أول اسبوعين قبل ما يلحقه فيلم جيمس كاميرون الجديد "Avatar" ويحقق شوية فلوس ..

جدير بالذكر إن آخر أفلام المخرج جيمس كاميرون كان فيلم التايتانيك، واللي هو أعلى فيلم إيرادات في التاريخ على الإطلاق ..

فلوس كتير اوي .. ما يدوني مليون دولار كده علشان كتبتلهم الخبر ده ..؟ مش ممكن ؟ لأ .. طيب حد يكلم أنجلينا جولي تتبناني طيب .. أي حاجة والنبي ..

بيونسيه بترمي نفسها على الجمهور

ده كويس محصلهاش حاجة .. وكويس كمان إنها معملتش الحركة دي لما جات على مصر، أعتقد كان ممكن ببساطة تعملها، بس كده كانت هتأخد سكة اللي يروح وميرجعش ..

زي ما إنتو شايفين بالفيديو .. بيونسيه بحفلتها من يومين كده بلندن قررت ترمي نفسها على الجمهور .. تعمل كراود سيرفينج يعني .. تزحلق على الجمهور بالترجمة الحرفية ..

الجمهور طبعًا اتجنن واتهوس ..

مادونا رايحة تقابل ماما

مادونا، المغنية الأمريكية المشهورة راحت تقابل ماما تبع حبيبها البرازيلي اللي اسمه جيسيس ..

فكرة إن اسمها مادونا (زي السيدة مريم) واسمه جيسيس (زي المسيح عيسى) عاملالي مشكلة بدماغي .. المفروض يمنعوهم يعملوا أي حاجة مع بعض خالص ..

المهم يا باشا مادونا راحت على البرازيل علشان تقابل مامت جيسيس اللي هو عمره تقريبًا 21 سنة .. مادونا على فكرة عمرها 51 سنة ومامة جيسيس عمرها 36 سنة ..

احم ..

في المشكلة ؟! أنا مش شايف مشكلة خالص بالأرقام دي .. إنت شايف أي مشكلة ؟!

المهم المشاعر الجياشة والفلوس المتلتـ .. احم .. قصدي والحب والصداقة اللي بين مادونا وجيسيس .. :)

كنت عاوز احطيلكم صورة لمادونا وجيسيس اتصوروها أول ما تصاحبوا وهما .. أحم .. بيحبوا ببعض .. بس قلت لنفسي احترم نفسي وبلاش المدونة تقلب للكبار فقط .. فدي صورة الاتنين بشكل محترم ..

صباح الخير بجد ..

بيونسيه

الست دي معجزة ..

يوم الجمعة بعد الظهر كانت بيونسيه ببرلين مع جوزها جاي زي علشان تحضر حفلات الـ MTV الأوروبية ..

ويوم الجمعة بالليل كانت بيونسيه ببورتو غالب بتعمل أحلاها شوو بمصر كلها وبتقدم حفلة محصلش بمصر ..

أنا كنت بالحفلة وحضرتها، بيونسيه جايبة معاها السيت بتاعها كامل والمسرح بتاعها والدانسرز بتوعها وكل حاجة بتاعتها ..

كانت حفلة من الخيال بجد .. بجد محصلتش ..

:)

تحيات وش خشب للفنانيين اللي بيتعبوا وبيبدعوا مش بس بيقعدوا ببيوتهم وبيلعبوا  ..

Robbie Williams - You Know Me

You Know Me - Robbie Williams (Official full-length video)

Robbie Williams | MySpace Video

أغنية روبي ويليامز الجديدة اللي طلع الفيديو بتاعها بس هيي مش للبيع قبل 7 ديسمبر ..

أغنية كريسماس اوي يعني ..

هيي ناقصاكي مشاكل يا توني براكستون ؟

المغنية الجميلة توني براكستون، واللي كلنا عارفين أغنيتها Unbreak My Heart وأكيد كلنا غنيناها بالشاوور أو سمعناها بعد الساعة 2 بالليل لما كان عمرنا 13 سنة، انفصلت عن جوزها بعد تمان سنين مع بعض ..

هل هتغنيله كمان Unbreak My Heart ؟؟

الست دي حياتها كلها مشاكل مؤخرًا، عندها مشاكل مادية لأن محدش بيسمعلها أو بيشتري المزيكا بتاعتها بقالها سنين، وكمان مشاكل صحية لأنها اضطرت تعمل عملية بقلبها مؤخرًا .. يعني الدنيا مش ناقصة خالص ..

معلش يا براكستون .. إن شاء الله خير .. وتعالي إنتي مصر وأنا اجوزك سيد سيده :)

فيوليت أفليك .. يا أختي كميلة

البنوتة دي لما تكبر هتكون مزة بعبط ..

فيوليت أفليك، بنت الممثل المعروف بين أفليك ومراته جنيفر جارنر (اللي كانت الممثلة الرئيسية بمسلسل آلياس لو كنت بتسأل)، قررت تقضي يومها مع الناني بالجنينة بأول أيام العطلة الأسبوعية .. (حلوة العطلة الأسبوعية دي .. الوويكاند يعني).

الصور مسروقة من عمنا بيريز هيلتون دوت كوم :)

كريس براون حالته بالويل

كريس براون كان من يجي سنتين كده حد مهم جدًا ..

وعلى فكرة كان ده فعل "ماضي" ناقص ومعناه إن اللي كان .. ما عدش موجود ..

كريس براون كده في فبراير اللي فات رفع إيده على صاحبته، المغنية المعروفة "ريهانا" وضربها بالشارع وتقريبًا شووها جدًا ..

الموقف زي ما إنت شايف مكنش حلو وريهانا مخدتش الموضوع بيس أوي يعني ..

والصحافة وكل الناس قامت على كريس من وقتها، وكل الناس قلبوه قلبة وحشة بجد ..

الراجل ـ طبعًا ـ يستاهل كل اللي حصله، بس دلوقتي هو بيحاول يرجع للأضواء من جديد ..

محاولاته دي فاشلة بعبط طبعًا ..

هيطلع كريس  براون ألبومه الجديد Graffiti بسبعة ديسمبر الجاي، وهيطلع أغنية جديدة اسمها Let Me Transform Ya كمان أسبوع ولا أسبوعين.

المشكلة إنه معتقد جدًا إنه لو عمل جولة فنية دلوقتي الناس ممكن ببساطة تيجي وتحضر حفلة هو اللي عاملة بعد ما أوبرا وينفري عملتله مصيبة ع التلفزيون بعد اللي حصل مع ريهانا ده ..

براون، واللي كان بيقدر يعمل حفلة يحضرها 20 ولا 30 ألف بني آدم دلوقتي مش قادر يبيع تذاكر حفلة لألف بني آدم ..

شكلك كده يا باشا مش هترجع للمزيكا ..

ممكن تجرب تروح تشتغل بحلبة مصارعة مثلاً ..

باك ستريتز باك ..؟؟ طيب ....

من ييجي عشر سنين، بفترة من حياتنا لما كنا بنلبس هدوم ما يعلمش بيها إلا ربنا، وبيطلعلنا حب شباب، كان في فريق اسمه باك ستريت بويز كلنا مجنونين بيه ..

الفريق ده ـ تصدق ؟ ـ لسه موجود وبيعمل مزيكا .. مش زي زمان طبعًا بس شغال يعني ..

Backstreet's back ? Alright..?!

المهم يا سيدي .. الفريق اللطيف طلع أغنية جديدة اسمها Bigger والأغنية ـ هعترف ـ لذيذة أوي واللهي وعاجباني جدًا ..

لو طلعوا الأغنية دي بالتسعينات كانت هتبقى واحدة من أهم أغانيهم ...

المهم يا سيدي .. اتفرج على الفيديو واسمع الأغنية فوق..

إنت حمار يا حمار ؟؟

في راجل روسي اعطى معنى جديد لكلمة "سكران" الأسبوع اللي فات ..

الراجل الرايق كان بيشتغل بمستودع مشروبات كحولية (فودكا وكونياك) وكان سايق الشاحنة الصغيرة بتاعته وهو بيشرب (شكله سرقله إزازة من أي حتة) وفات بالحيطة ووقع كل الأزايز  اللي بالمستودع .. واللي تمنها وصل لمية وخمسين ألف دولار أمريكي مرة واحدة.

الراجل طلع من الحادث سليم ما عدا إصابة صغيرة برجله، بس غالبًا هيكون دلوقتي مطرود من الشغل ..

اتفرج على الوقعة السودا في الفيديو فوق ..

خفاش بيرعب الناس بمبارة كرة سلة

يوم الجمعة اللي فاتت، وبمبارة كرة سلة حاسمة بين فريقين أمريكيين (يقطعني لو بعرف مين من مين بالسلة الأمريكية) خفاش دخل المباراة وقعد يلف حول الملعب، المخلوق الضعيف طبعًا (يا عيني) كان مرعوب رعبة مش طبيعية بس في لاعب كرة سلة محترم كده قرر إنه لازم يجيب آخرته علشان يعرفوا يلعبوا .. وبالفعل نط وجابه من السما بإيد وحده ..

يع ع ع ع ع ع!

اتفرج على المشهد فوق..

Top Spot: This Is It

فيلم "This is It" أخد الأولية بسباق أفلام أمريكا للأسبوع ده، المشكلة إن الفيلم محققش المبيعات اللي كان الكل بيحلم بيها، بس على الأقل حقق مبيعات مناسبة لأنه يوصل لحد هنا ..
الفيلم ـ للي مش عارفين ـ بيتكلم عن مايكل جاكسون اللي مات قبل ما يعمل آخر جولة بحياته، وإزاي الجولة دي كانت هتحصل لو ممتش في يوليو اللي فات.

شاكيرا وأغنية جديدة

شاكيرا نزلت أغنية جديدة اسمها "Did It Again" بفيديو خرافي الجمال، الأغنية برأيي أحلى من أخر أغنية نزلتها "She Wolf" من ناحية الفيديو لأن الأغنية التانية مكنتش رايحة لحتة بالفيديو .. بينما دي بالفعل متصورة حلو .. وفي مشاهد رقص جامدة جدًا مع الواد اللي معاها بالفيديو بطريقة تجمع بين الرقص والخناق والحب والرغبة و ...

إيه الكلام الفاضي اللي أنا بقوله ده ؟ روحوا اتفرجوا على الفيديو وما تسمعوش كلام واحد فاضي ..

ميل جيبسون بقى .. بابا

ميل جيبسون بقى بابا للمرة الثامن في حياته يوم الجمعة اللي فاتت، لما جاله بنوتة صغيورة كده من خطيبته الجديدة Oksana Grigorieva .. وده حسب كلام موقع رايدر أون لاين للأخبار والفضايح .. الكميلة الصغيرة ولدت ثلاث أسابيع بدري عن ميعادها، بس كل حاجة كانت كويسة ومفيش أي مشاكل، حتى إن جيبسون خد خطيبته وبنته وراح فيهم على البيت خلاص ..

خطيبة جيبسون، واللي كانت صاحبته بالسر لما كان متجوز، بس بعد ما طلق مراته بقت خطيبته، عندها ولد تاني من النجم السينمائي تيموثي دالتون، اللي عمل جيمس بوند بيوم من الأيام كده ..

يعني الست ـ واللي شكلها بالثلاثنيات من عمرها ـ ليها بالناس الكبيرة كده زي ما أحنا شايفين ..

يا سيدي .. ربنا يهني تنتون بتانتان .. بس برأيك كده ؟ طليقة جيبسون هيكون رأيها إيه  بالموضوع ؟؟؟

يا فضحيتك يا ميدو

حسب كلام موقع عيون على الفن، تعالى اتفرج على "فضيحة حريم ميدو بالصور" ..

فأحمد حسام، لاعب الزمالك المعروف بميدو، واللي تم منعه من التدريب بعد تغيبه عن النادي لفترة طويلة، ظهرت له صور (غالبًا حد من الموقع لقاها على الفيس بوك) مع بنات وأنسات وشكله مبسوط ويومه سعيد كده ..

أنا خدت واحدة من الصور دي وحطيتها هنا، بس هيي ملكية عيون ع الفن وأنا ماليش دعوة بيها يعني ..

الصور بتحاول تقول إن الراجل عايش حياته وكده وإنه ماشي مع مزة من المزز دي اللي بالصور معاه، بس بصراحة اللي أنا شايفه، ورأيي الشخصي يعني، إن الراجل طالع مع اتنين معجبات في أول كام صورة، وبعدين طالع مع بنات في إعدادية بالكتير بآخر كم صورة، يمكن دول صحاب حد قريبه أو حاجة زي كده ..

ثم بصراحة، حتى ولو افترضنا إن ميدو ده بيعمل حاجات وحشة بالليل وبيشرب حاجة اصفرة أو أي حاجة، أنا شايف إن اللاعب أو الممثل أو العالم أو الأديب مش لازم يكون يعني ذروة الشرف وقمة العفاف، ممكن جدًا يكون قليل الأدب ويعمل اللي هوه عاوزه بصراحة، وده مش بيقل من قمته الرياضية/الفنية/الأدبية/العلمية بأي شكل من الأشكال لأننا كلنا مش ملايكة وكلنا بنعمل حاجات وحشة لما محدش يكون شايفنا ..

يا سيدي المهم دلوقتي .. ابقى ادينا ألوو يا عم ميدو لما تخرج خروجة زي كده ..

مسلسل عن حياة الصبوحة

فكرة إن حد يعمل مسلسل عن الصبوحة دي كانت فكرة عبقرية بجد محتاج اللي فكر فيها يأخدله يجي مليون جنيه ..
الست عايشة حياتها بالطول والعرض، ولو المسلسل كان بالفعل دقيق ومفهوش نصب ونقل الواقع على حقيقته أعتقد بجد إني هقعد واتفرج ..

الصبوحة .. شحرورة لبنان الشقراء صباح وافقت يتعمل مسلسل كامل عنها يتعرض في رمضان الجاي، ووقعت على العقد بالفعل ودلوقتي بيدوروا على حد يقوم بدورها بالمسلسل.

ووافقت المسلسل يتكلم عن جوازاتها التسعة اللي فاتت، وأهمهم جوازها من رشدي أباظة وجوازها من فادي لبنان ..

أعتقد بجد إن المسلسل ده هيعمل شكل جامد لو اتعمل كويس ..

بصراحة علشان هيكون عندي حاجات كتير ممكن اكتب عنها من ورا المسلسل ده، أصل الفضايح بحياة الصبوحة مبتخلصش ..

برأيكم .. هتطلع الصبوحة تعمل دور نفسها بالوقت الحالي على آخر حلقتين من المسلسل ؟؟

ويل سميث يرجع للنظارة السودا

مش فيلم السبعينات المصري طبعًا، قصدي فيلم "Men In Black" ..

النجم الأمريكي الأسمر هيعمل جزء ثالث من سلسلة الخيال العلمي والأكشن والكوميديا المعروفة، وهيرجع يتعامل مع تومي لي جونز برضه في الفيلم ..

هو بصراحة الفيلم يستاهل، الجزئين الأول والثاني جمعوا مع بعض أرباح وصلت لملياااااار دولار أمريكي ..

ما تدوني واحد بالمية من المليار ده .. مش عاوز أكتر من واحد بالمية ..

هو الموضوع لسه إشاعات بالنسبة للممثلين، بس خلاص استديو الإنتاج اتفق مع مخرج وكاتب علشان يعملوا الفيلم، وشكل الممثلين أكيد هيشاركوا كمان ..

قصدي يعني تومي لي جونز بيعمل فيلم ناجح مرة كل ثلات سنين، وأكيد ويل سميث هيشارك بالفيلم ..

تامر حسني مش هيعمل مسلسل

 

كل الأنسات اللي تحت العشرين واللي بيموتوا بتامر حسني ممكن دلوقتي يروحوا يعيطوا لأنه مش هيعمل مسلسل، وكل الرجالة اللي فوق العشرين واللي مش بيحبوا تامر حسني ممكن يرتاحوا ويتأكدوا من أن تمورة مش هيطلعلهم بالتلفزيون كمان برمضان الجاي.

تامر حسني، وبعد ما انتشرت أخبار إنه هيعمل مسلسل تلفزيوني لرمضان الجاي وإنه عايز ياخد 15 مليون جنيه مقابل دوره بالمسلسل (يا ترى مين اللي طلع الخبر ده ؟ أنا بقول تامر نفسه هو اللي طلعه بعد ما سمع عن موضوع مسلسل عمرو دياب)، المهم إن تامر أكده إنه مش فاضي (يا حرام) وبيجهز لفيلمه الجديد اللي هيفلقـ .. قصدي هيتحفنا بيه الصيف الجاي...

الحمد لله يا رب .. مفيش تامر بالتلفزيون المصري، مش ناقص أصله التلفزيون مع مسلسل يسرا ونور الشريف ويحيى الفخراني ..

 على فكرة يا تمورة .. اللي عاملك تنضيف بشرة بالصورة دي كاسفك خالص ..

شيخ الأزهر عايز يجيب آخرة إيناس الدغيدي

واحد من مشايخة الأزهر (ربنا يكبر من عمامتهم يا رب) قرر إنه يشارك جريدة وشوشة (جريدة صفرا كده محدش بيشتريها) رأيه الشخصية بالمخرجة المعروفة إيناس الدغيدي ..

الراجل مش عاوز كتير، عاوز بس إنهم يصلبوا إيناس الدغيدي ويقطعوا رجليها وإيديها .. عادي يعني أصله لسه شايف فيلم "محرر العبيد" وقرر إنه يستقي شوية أفكار منه ..

الراجل مخنوق كده لأن إيناس قالت الصيف اللي فات إن الحجاب زي المايوه كده .. موضة يعني ..

هو حد سمع إيناس بتقول الكلام ده ؟! ولولا الشيخ العلامة ده ذكر الكلام بجريدة، برأيك حد كان هيعرف إن إيناس قالت الكلام ده ؟

الشيخ بيختم كلامه قائلاً إن الست دي من أعوان الشيطان وإحدى خادماته، وإنها بتحارب رسول الله ودين الله .. ولازم تتصلب وتتعذب وكده يعني ..

يا راجل! أعوان الشيطان حتة واحدة ؟! سبحان الله ..

الشيخ، وأنا مش هذكر اسمه علشان مش عاوز نبيه الوحش يرفع عليّ قضية إتجار بالدين ولا أي قضية ملفتة للنظر من قضاياه إياها، كان ثاني من يرد على إيناس، ونبيه الوحش (يا للصدفة العجيبة! على رأي جريندايزر) هو اللي رفع القضية الأولانية، بيطالب بفصل إيناس الدغيدي عن جوزها، علشان كلامها ده بيخليها غير معتنقة للدين الإسلامي، يبقى كده لازم يبعدها عن جوزها المسلم ..

يا سلام! وإنته الآخر إيه عرفك جوزها مسلم ؟! مش ممكن عربيد صعلوك بيحب يشرب خمرة بالليل برضه ؟!

يا سيدي .. المهم بالموضوع بشكل عام حاجة واحدة بس ..

هو إيناس الدغيدي بتعرف تخرج أفلام أصلاً ؟ حد شافلها فيلم عدل بالسنين اللي فاتت ؟!

علا غانم ومسلسل الندم

لأ مش قصدي مسلسل اسمه (الندم) .. قصدي إنها مستمرة في الندم يعني ..

علا غانم أكدت لمجلة (لها) إنها نادمة على إنها شاركت في فيلم "الأكاديمية" اللي بيتعرض دلوقتي في شاشات السينما (ومحدش بيدخله إلا اللي ضغطه منخفض وعاوز يتعالج) ..

وعلا أكدت إنها مش ندمانة على الفيلم علشان إحساسها بنفسها وصورتها اللي (مش ولابد) على الأفيش .. لأ .. هيي ندمانة على القيمة الفنية بتاعة الفيلم، وهيي حاولت تقول للمخرج كذا مرة إن الفيلم ناقصة حاجة (دينا الرقاصة مثلاً ؟؟) بس المخرج مسمعش كلامها ..

شايفين يا جماعة ؟ دي مش غلطة علا .. دي غلطة المخرج ..

وده يعتبر ثالث فيلم للممثلة المخضرمة علا غانم بتعبر فيه عن ندمها في اختياره، كأن في حد جيه وحط مدفعية بوشها وقالها تمثل غصب عنها، فهيي ندمت على فيلم "لحظات أنوثة"، وكمان ندمت على فيلم "بدون رقابة".

معلش يا علا! هو آخر فيلم إنتي مثلتي فيه ومندمتيش عليه كان إيمتى ؟!!!

بصي يا علا هيي حاجة من اتنين : يا إما إنتي مبتعرفيش تختاري أفلامك صح!! يا أما المخرجين والمنتجين حاطين عنك صورة معينة بأذهانهم ومش هيدوكي إلا الأدوار اللي زي دي .. واللي بتندمي عليها برضه ..

علا دلوقتي بتمثل دورها في فيلم "أحاسيس" .. يا ترى هتطلع على أي مجلة بعد الفيلم علشان "تكشف عن ندمها" عن الفيلم برضك؟

فيلم جيمس كاميرون مسروق ؟

دلوقتي كلنا عارفين إن جيمس كاميرون (المخرج العبقري اللي عمل التايتانيك وطلع أول جزئين من سلسلة Terminator) بيجهز لفيلمه الجديد AVATAR، وهو فيلم خيال علمي بتدور أحداثه على كوكب تاني وكلام كبير من النوع ده ..

الفيلم هيكون ثلاثي الأبعاد (طبعًا ده حلم بعيد بالسينمات المصرية بس نعمل إيه؟!) وزي كل أفلام كاميرون هيكون تحفة فنية رائعة ..

المشكلة إن في حد بيتهم كاميرون دلوقتي إنه سرق فكرة الفيلم وقصته من رواية صدرت في الخمسينات اسمها Call Me Joe.

الفيلم بيتكلم عن واحد من المارينز المستقبليين أخد إصابة في معركة واتشل، فوافق إن الإدارة تبعته يحتل كوكب تاني مع مجموعة من صحابه عن طريق التحكم عقليًا بأجهزة آلية .. فبيحس إنه بيمشي من جديد ..

المشكلة إنه يمكن يضطر يتخلى عن ده علشان هو ضد إنهم يحتلوا كوكب جديد ويقضوا على الناس اللي عايشين عليه.

والكتاب بيتكلم عن واحد مخلوق فضائي عايش في بيئة معادية أوي بيحس بالسعادة لما يتحكم ـ برضك ـ بأجهزة آلية بتخليي يعيش على كوكب تاني، ويقاتل من أجل السلام على الكوكب التاني ..

يعني في فكرة واحدة تقريبًا هي فكرة الأشخاص اللي بيتحكموا بأجهزة آلية تخليهم يعيشوا حياة تانية وبيقاتلوا من أجل السلام ..

أنا مش حاسس أوي يعني إن الموضوع مسروق، ممكن يكون توارد خواطر، بس مش مشكلة أوي مع كاميرون، هيروح للورثة بتاع الكتاب يديهم خمسة ستة مليون دولار يسقطوا الدعوة ويخلص الموضوع على كده ..

شوف تريللر الفيلم فوق وقل لي رأيك يا باشا ...

هيدي كرم : جوزي بيغار علّي

لأ بجد يا حبيبتي ؟!

معلش يا أختشي معلش ..

الممثلة هيدي كرم قررت ترفع دعوة خلع ضد جوزها (واللي الخبر متعبش نفسه وذكر اسمه من الأساس) علشان بيغار عليها جدًا ومش سامحلها تعيش حياتها وتمارس شغلها زي ما هيي عاوزة ..

هي بتقول إنها حاولت تشرحله وجهة نظرها بطبيعة الحال (يا عين طانط عنيات)  وقالتله إن ده شغلها، وإن طبيعة عملها إنها تحتك بالمعجبين والفنانين وكده، بس هو بيغار عليها اوي خالص خالص .. فوجدت نفسها أمام خيارين إما الزواج أو العمل ..

طبعًا البنت الذكية تعرف مستقبلها فين، فراحت وقررت إنها تخلع جوزها وتتجوز شغلها ..

مبروك الخلع يا هيدي هانم، وشكرًا على دورك المميز في فيلم "حفل زفاف" اللي أنا مش فاكره أصلاً (وكمان مش عاوز افتكره) ..

النجوم وعرض فيلم جاكسون الأخير

مجموعة كبيرة من نجوم الفن والسينما قرروا يحضروا حفل إفتتاح فيلم "This Is It" في مدينة لوس أنجلوس مبارح التلات، طبعًا أنا رحت وسرقتلكم الصور من موقع بيريز هيلتون دوت كوم علشان تعرفوا تتفرجوا براحتكم عليها.

من بين الناس اللي حضرت كان ويل سميث وأدم لامبريت (مغني برنامج أميركين أيدول الناجح) وكيتي بيري وبولا عبدول وجنيفر لاف هيويت وغيرهم كتير ..

الناس راحت تتفرج على الفيلم وبعضهم طالعين عايشين الدور خالص يعني، بولا عبدول كتبت على التويتر بتعها إنها (مليانة مشاعر ومش عارفة تعبر عن نفسها وهيي بتتفرج على الفيلم).

أنا لسه مشفتش الفيلم وهشوفه يوم السبت مع صحابي، ربنا يسهل وألاقي تذاكر، شوية ناس طالعة بتقول الفيلم دموع وبكا وعياط وهتطلع مش طايق نفسك وناس طالعة بتقول إن الفيلم وحش وملوش لازمة ووجع دماغ ع الفاضي ..

يا سيدي .. هنتفرج ونشوف ..

هتروح تتفرج إنت على الفيلم ؟؟

يوسف معاطي في معاطي شو

الأسماء خلصت على فكرة ومعدش فيه إلا حاجة كلمة "شو" دي .. هالة شو .. بني أدم شو (بتاع أحمد أدم على قناة الحياة).. ودلوقتي "معاطي شو" سيادتك .. كله على أمل التمسح بفكرة أوبرا وينفري شو .. ربنا يخليكي لينا يا ماما أوبرا.

مين معاطي ده ؟؟

ده الكاتب الساخر طبعًا واللي وافق (لاحظ كلمة وافق دي كأنما كان في حد عبقري قاعد بقناة تلفزيونية ما وفكر فوجأة إنه يعمل الفكرة دي) إنه يعمل برنامج إذاعي وتلفزيوني (بالمرة .. ما هو كله كلام) يذاع على التلفزيون المصري وإذاعة الشرق الأوسط.

يوسف معاطي، واللي كتبنا مجموعة من أهم الأفلام السينمائية مؤخرًا، منها فيلم "بوبوس" طبعًا، هيطلع على التلفزيون لمدة ساعتين كل أسبوع، ويقدم البرنامج السياسي الساخر على غرار برامج ديفيد ليترمان شو وليت نايت شو اللي  بنشوفها على التلفزيون الأمريكي ...

معاطي هيقبض خمسين ألف جنيه على كل حلقة، وهيبدأ عرض البرنامج مع أول يناير الجاي ...

هتتفرج يا ترى ؟؟ أنا معتقدش إني أنا هتفرج ..

طفل كمال أجسام

في حاجات بتضايق بالدنيا دي، بس دي واحدة من أكتر الحاجات اللي بتدايق على الإطلاق ..

الطفل اللي إنتو شايفينه بالصورة بالفعل عامل كمال أجسام، ودي صورته وهو عمره 9 سنوات بس!!

الطفل ده، واسمه جويليانو سترو، وهو روماني، بدأ تدريبه على كمال الأجسام لما كان عمره سنتين!!

مفيش حاجة اسمها بدأ تدريبه لما يكون عمره سنتين، إحنا مش بنتكلم هنا عن أدهم صبري بصراحة، شكل كده باباه كان مجنون كمال أجسام ولا حاجة ..

الطفل ده دخل موسوعة جينيس للأرقام القياسية، مش علشان كمال الأجسام، لأ! علشان كان أسرع واحد مشي عشرة أمتار كاملة وفي كرة حديدة بين رجليه بدون ما توقع الكرة.

الفيديو اللي فوق الطفل فيه وهو بيتمرن ..
ممكن أتمرن كده أنا كمان ؟؟

زيلويجر وكوبر لسه بيحبوا بعض .. بلاش حسد منك له

من باب العلم بالشيء مش أكتر ..

عمنا برادلي كوبر وعمتنا رينيه زيلويجر مسابوش بعض يا رجاااالة ..

هما كانوا مع بعض أصلاً ؟

بتقول الإشاعات اللي انتشرت النهاردة الصبح إن الباشا الممثل (واللي بقى مشهور بعبط بعد فيلم The Hangover) ساب صاحبته الممثلة اللطيفة زيلويجر، واللي معملتش حاجة تفتح النفس من يجي خمس سنين.

الإشاعات دي (لا أساس لها من الصحة) زي ما بيقولوا كده بالمقالات المهمة، بالعكس الاتنين مبسوطين وفرحانيين وهيقضوا العطلة الجاية (مش عارف أي عطلة بصراحة، عندنا بالشغل مفيش عطل أساسًا فمش بتابع الرفاهيات دي) ببيت عيلة كوبر.

يعني زيلويجر رايحة تقابل بابا وماما علشان برادلي يحس بالسعادة ويفتخر أدام العيلة بقى وتشوفه بنت الجيران وكده ..

المهم يا سيدي .. اللي كان قلقان على مستقبل زيلويجر العاطفي ميقلقش .. البنت متضبطة على الآخر :)

قبول استقالة وزير النقل بعد حادث القطارين

هو أنا ماليش بالسياسة ولا بحب اكتب بيها، بس خبر زي ده لازم يتكتب ..
تمت الموافقة على طلب استقالة وزير النقل المصري المهندس محمد منصور وذلك بعد حادث القطارين الذي أودى بحياة مجموعة من المواطنين المتجهين إلى الصعيد، وخصوصًا بعد فشله في تطوير السكة الحديد وتجاهله لكل إحتياجاتها في الفترة الماضية.
بصراحة هي خطوة كويسة اوي إن يحصل حاجة بالأريحية دي وبالوضوح ده! الراجل مش عارف يعمل شغله وعمل مشكلة، يبقى يستقيل .. وطبعًا المناظر المأساوية اللي كلنا شفناها بحادثة القطار دي خلت موقف زي ده موقف كويس من الحكومة ..
إن شاء الله اللي يجي بعده هينضف السكة الحديد ويعمل منها مشروع قومي ولا حاجة لأن بجد السكة الحديد دي حاجة ممتازة للسفر والتنقل بكل الأشكال وبجد مفيش أحلى من القطارات للتنقل لما تكون أمنة وسالمة وكويسة ومش ثلاجة ولا هولوكوست ..

عقدة الخواجة ؟؟ منى وحلمي بيتعلموا تمثيل على إيد الأمريكان

حسب كلام موقع في الفن (واللي بحب اسرق منه أخبار طول الوقت) أحمد حلمي ومنى زكي وغيرهم يخضعون حاليًا لجلسات تدريبية على التمثيل على إيد خبراء أمريكيين من (أكاديمية هوليوود) ..

الخبر (واللي واخده في الفن من موقع المصري اليوم، يعني مش أنا الحرامي الوحيد) بيقول إن في 15 ممثل تانيين بيتعلموا على إيد الخبراء لمدة ثلاث أسابيع منهم أحمد عز وفتحي عبد الوهاب وخالد الصاوي ودينا وسوسن بدر وأنوشكا وكارولين خليل.

طيب يا سيدي .. حلو اوي إحساس الدراسة ده .. فاتحين الكراسات وقاعدين بتغششوا من بعض ؟؟

يا عز بطل تبص بورقة الصاوي .. عارف طبعًا إنك أمور وده اللي مخلي الناس تشغلك بس حاول .. بليز يعني حاول تمثل لمرة ..

ضحية الإعتداء مش عايزة ترفع قضية على بولانسكي

أنا بصراحة مش فاهم إيه موضوع بولانسكي ده .. في حاجة غريبة بتحصل فيه وأنا مش قادر أفهمها بصراحة ..

الراجل من حوالي الثلاثين سنة شرب بنت عمرها 13 سنة (حاجة أصفرة) واعتدى عليها، واترفعت عليه دعوة وهرب من الولايات المتحدة على فرنسا وعاش هناك السنين اللي فاتت دي كلها ..

ودلوقتي هو مقبوض عليه باسم الدعوة دي مرة تانية ..المشكلة بقى إن صاحبة الدعوى الأساسية، البنت اللي كان عمرها 13 سنة ودلوقتي عمرها فوق الأربعين بتقول إنها مش عاوزة الدعوة خلاص .. بتقول إن كل الإعلام اللي حاصل حوليها والصحافة وكل الكلام ده مخليها مش عاوز ترفع الدعوة أساسًا ..

بتقول إنها بيجيها 500 تلفون باليوم من الصحافة والإعلام علشان يسمعوا تعليقها على كل حاجة بتحصل بالقضية، بتقول إن ناس كتيرة طلبت منها مقابلات زي أوبرا وينفري مثلاً بس هيي رفضت ..

بتقول إنها مش عارفة تشتغل ومش عارفة تعمل إيه حاجة ..
دلوقتي إنت رأيك إيه ؟؟ هل علشان الست دي تقدر ترتاح وتبطل وجع الدماغ اللي من حوليها ده وكل المشاكل اللي بتؤدي إليها نقفل الدعوة على كده ولا نعمل إيه مع بولانسكي ؟؟

في ناس كتير بالمجتمع الأمريكي متعاطفين مع المخرج، وفي ناس عايزين يجيبوا أخره .. إنته إيه رأيك ؟

مايلي سايرس ؟! ممكن تلمي أختك لو سمحتي

البنوتة الأمورة اللي عمرها عشر سنين دي .. هي أخت مايلي سايرس .. مغنية المراهقات المعروفة واللي عاملة جو ابن ستة بسبعة بقالها سنتين ..

البنوتة دي، واسمها نوها سايرس، عمرها تسع سنين، وزي ما أنتو شايفين لابسة هدوم مش مناسبة خالص للي عمرهم تسع سنين ..

المشكلة مش هنا، المشكلة إن ده التنكر بتاع الهاللوين .. يعني بابا وماما اشتروها الحاجات دي علشان تروح "تعيّد" بيهم ..

ماشي يا سيدي .. الحمد لله إن العيلة منفتحة ..

الصورة ـ على فكرة ـ مسروقة مع موقع بيريز هيلتون .. :)

البقاء لله يا يارا!

توفى والد المغنية يارا في لبنان يوم الأربعاء 21 أكتوبر، وقررت يارا ترجع من قطر علشان تكون مع عيلتها بالموقف الصعب ده ..
معلش يا يارا، البقاء لله ..
يارا اضطرت تقطع زيارتها لقطر واللي كانت هتعمل فيها حفلة هناك علشان ترجع للبنان بعد أخبار الذبحة الصدرية اللي خدت منها والدها من أقل من أسبوع، وهيي دلوقتي بلبنان مع العيلة ..
يارا كانت متفقة مع وائل كفوري إنهم يعملوا مع بعض أغنية جديدة مشتركة، بس المشروع دلوقتي وقف لحد ما تقدر يارا ترجع لشغلها بعد ما تخلص فترة الحداد ..

راندا البحيري ونجاح "ليالي الحب"

إنته سمعت عن مسلسل "ليالي الحب" ده ؟ أنا مسمعتش عنه أصلاً بصراحة ..

بس بالآخر يمكن ده يكون تقصير مني مش أكتر ..

المهم يا باشا إن المتحدثة الرسمية باسم الممثلة المزة راندا البحيري بتقول إن نادي بتعيش حالة من النشاط الفني وبتصوير كمية أعمال ممتازة بعد نجاح "ليالي الحب".

معلش هو المسلسل ده اتعرض فين بالضبط؟! ولا فاكر حتى إي حاجة عنه ..

المهم يا باشا إن راندا رجعت تصور مجموعة من حلقات الجزء الثاني من مسلسل "لحظات حرجة" مع يسرا وأمير كرارة وراندا البحيري (أيوه مع راندا البحيري لأن راندا البحيري بتحب تصور مع راندا البحيري .. الخبر مكتوب كده في موقع "في الفن").

المسلسل ده هو المقتبس عن مسلسل "ER" الأمريكي المعروف، أنا شفت منه حلقة واحدة بس (الحلقة بتاعة لطيفة التونسية) وحسيته متصنع أوي، بس ده مش حوارنا خالص.